ردت الفنانة الأردنية “نداء شرارة” على تعليق من أحد المتابعين لها عندما قال”لا تستني شكلك رح تعنسي” بعدما نشرت صورة لها عبر الفيسبوك وكتبت عليها “لسه في الأيام أمل مستنيينه طول ما في الأيام في ناس عايشين عشانها لسه للأحلام بقية مكملينها طول ما في احساس قلوبنا مصدقينه”.
حيث تفاجأت نداء من تلقيها تعليقًا من أحد متابعي صفحتها قال فيه “لا تستني شكلك رح تعنسي” الذي دفعها للرد بطريقة راقية بعدما كان معروف عن نداء أنها تتجاهل التعليقات المسيئة فكان ردها عبر حسابها على “انستغرام” من خلال رسالة كتبت فيها “معلش استوقفني تعليق هاد الشخص وبالعادة اي شي بيستوقفني بحب ارد عليه .. واحتراما لشخصك علما انك لا تستحق بس ما خليت اسمك يبين .. انا بس عندي تعقيب ع مصطلح عانس مين اللي اخترع هاد المصطلح .. انا بعد سنه رح اصير ٣٠ سنه يعني هل انا رح اصير معنسة..؟”.
وتابعت شرارة “هو ما ضَل شي تضغطوا في ع المرأة فصرتوا تنعتوها بكملة عانس وياريت على عمر ٣٠، هلأ بالعشرينات وبسألوكي ليش لسا مَش متجوزه وكإنو في مشكله فيكي يعني وفي بنات بتدخل بحالة اكتئاب كل ما سمعت انو في وحدة من صاحباتها تجوزت لانو اللي حواليها ضاغطينها!!”.
“الناس اللي بتفكر بهالطريقه انتم والجهل وجهان لعملة واحدة، لأ وبضحكوني بس يقعدوا يقولوا لاي وحدة متى رح نفرح فيكي، خلص كبرتي ، وقلت فرصك ، اقبلي بأي شي هلأ ، لحقي خلفيلك ولدين قبل ال ٤٠ او في اهالي ماشيين على مبدأ خلينا نجوزهم صغار من باب انو كبرت وقادرة تفتح بيت خلص ومش قادرين ع مصاريف البنات فبنجوزهم صغار …!!! وبالآخر بيسألوا ليش في حالات طلاق معبيه الدنيا !!؟ على فكره انا بقبل اضل مَش متجوزة طول حياتي ولا اخد واحد شبهك وزيك .. البنت بكل المراحل بتضلها قمر وسكر ومنورة”.
موضحة أنه من تتأخر بالزواج لا يمكن نعتها بالعانس حيث أضافت “واللي ما بجيها نصيبها مَش عانس هيك رب العالمين كاتب كل تأخيرة وفيها خيرة وفِي نماذج كثيرة بالعالم لسيدات ناجحة ومستقلة و مَش متزوجين مين قلك الست ناقصة اذا ما تزوجت”.
وتابعت “هاد نصيب مكتوب من عند رب العالمين، بكفي تضغطوا ع بناتكم عشان خايفين من هالمصطلح ومن حكي الناس حبوهم واسندوهم وغطوهم برموش عيونكم ، يعني واذا صارت ٣٠ وتصير بأي عمر كمان خلي العسل بجرارة حتى تغلى اسعاره ولما ربنا يريد ..الله يكتب لكل بنت بساعة هالفجر الفرح والراحة والسعاده وبيت مليان حب وسعادة دائمة اهم من زواج مليان كره و مرار وقلة تقدير ومشاكل ووجع راس لاولادهم بس لانها اضطرت تتجوز عشان خايفه تكبر وتروح فرصتها”.
يذكر أن” نداء شرارة” مغنية أردنية حصلت على لقب ذا فويس في عام 2015، ونالت أعلى نسبة من التصويت، وتميزت عن كل المتسابقات بارتدائها الحجاب، طول فترة المسابقة.
اقرأ أيضاً “كاريس بشار” في أول لقاء تلفزيوني بعد أربع وعشرين سنة
رهف عمار
